اشعار دلنشین شاعر خورش رستمی جناب آقای ازبر کرمی
نربند لر(نارون لر)
بیر جوت ائل معشوقینین هجرینده کونلوم قان اولوب باخ نوازشلن دارانمیش تللره طوفان اولوب
ای قوجا نربندلر یادوز فراموش اولماسین دوغرانیب هر چند جسموز ،هیبتوز تالان اولوب
مهربان همسایه تک عمر ایله دوز ایللر بویی گون گوروبسوز بیربیروزلن غملَََروز پنهان اولوب
سایه سالماقدا تاپیبسوز افتخاری مسجده بو سببدن شُهرتوز مانند بیر سلطان اولوب
هر گورن انداموزی سویلردی جلّ الخالقا بیر باخیشدا گوزلری بیننده نین حیران اولوب
سیز صفانین مصدری دوز خلقه،بازار اهلینه بو ثواب ایشده سیزه قوشلاردا هم پیمان اولوب
یاخشی بالکن لار چکیلمیشدی،دوکانلار باصفا ایستی گونلرده سرین سو ملّته احسان اولوب
قوجالار شام و سحر صحبت یغینجین قوردولار هم اوشاق،پیر و جوانلار کولگیه مهمان اولوب
چوخ یاغیشلیقدا چکردیز بیر بیرین آغوشوزه آغلاییب سوندان گولوب تا اوزلروز خندان اولوب
گورسَنردی یام یاشیل،بیر چتره بنزه ردی باشوز هر گورن دلشاد اولاردی لذّتوز شایان اولوب
رحمت باری تعالی ده غریق اولسون او کس کی سیزی اَکدی،سوواردی،زحمتی جبران اولوب
کسدیلر حوضون سویون،توپراق توتوب فوّاره سین ایچدیگیز بوندان بِله ای مهربانلار قان اولوب
ناگهان طوفان گلیب،بوران قوپوب،رنگوز سولوب نعره ی ارّه موتوردان هر طرف لرزان اولوب
صحنه ی گویدن یره دوشمکده ملّت چکمیش آه حُزن و اندوهه باتیبلار گوزلری گریان اولوب
شاخ و برگوز دوغرانیب،رخنه دوشوبدور پیکره بو جفانین عاملی بیللم یقین انسان اولوب
کاش انسانلار بوتون مهرین اِوین آباد اِده تا محبّتدن گوره چوخ دردلر درمان اولوب
لذّت دنیا محبّتدیر ،گورنلر فیض آلیب باخ صداقت عالمینده چشمه لر عمّان اولوب
راه پر پیچ و خطر غفلتدیر انسانه اگر بیلمه سه بیر گون گوررکی خانه سی ویران اولوب
سرنوشت نارونلر درس دیر عارفلره (ازبر)ابیر جوت صونا گور غفلته قوربان اولوب
شعر زرجه
ورردی ملکه صفا سبزه سی آغاجلاری اونون طراوتی چون جسملرده جان زرجه
بورولموشیدی سو آرخی یولون کنارینده گلردی کنده کیمین مثل بیر ایلان زرجه
اولاردی باغدا گوزل میوه لر حلاوتی شیرین توتی ، گیلاسی هم ده گردکانزرجه
پیشیدی کاش گنه توتلارون دوشابلاری آغاج اولیدی باش اوستونده سایبان زرجه
صفای هفته خانا قیرخ بلاغ نج اولدی خدا سویی گله اله بیل شاهرگده قان زرجه
گلن گناغ لارا بیر باصفا تفرّج گاه صفا گورر دیله همچون بهشتیان زرجه
گلنده روضیه آرواد اوشاق او دول دولووه آنا کیمین سن اولاردون نه مهربان زرجه
یو واردی قاب قاشقی قیز گلین سو آرخیندا ایچنده کورپه سودان اولدی شادمان زرجه
گچن گجه سنی رؤیاده با صفا گوردوم اینان سویندیگیمه ایله دیم فغان زرجه
الیکی دوشدون اوگون بی وفا لرون الینه کسیب آغاجلاری یاندیردی غافلان زرجه
باخاندا دوشلره کول تک یانیب شراره چکیب گورنده حلقه ویرور گوزلریم ده قان زرجه
سنون غمون قانا دوندردی شاعرین اوره گین د دیکجه منقلب اولدی حالیم یامان زرجه
بشر نقدر یا تار خواب غفلته یارب جفای غفلته باخ ایله دی وران زرجه
یانیبدی قونشولارون آغلییبدیلار حالووا او گزمه لو ، خنیه ، باشدا ورگوان زرجه
جماعت آرزولادی باشدا سدّه شاهد اولا قضا قدر الدی آرزسین یالان زرجه
بنا قویوب گدن انسان جزای خیر گورر اوزی گولنمز اونون ریشه سین قازان زرجه
سو ورمه رسم ثواب انسانا،یره،آغاجا ایچیبدی سو یرینه لخته لخته قان زرجه
اوره کده آرزوسی وار ازبرون دعا ایلر دوباره سبز اولاسان مثل آن زمان زرجه
شعر از آقای ازبر کرمی هشجین
تبریک به آقای دکتر علوی به مناسبت انتصاب به ریاست دانشگاه تبریز
دکتر یوردوموزون افتخاریسان،بیر بویوک انسانین یادگاریسان
علمین بستانینین گلعذاریسان،مقامین مسندین مبارک اولسون
شهرتین علوی همتین عالی،آلیب سان علیدن درس کمالی
ائللرین ایچینده غیرت مثالی،وقارین همتین مبارک اولسون
گومه لی صداقت آی تک ئوزونده،بیر شیرین حلاوت باللی سوزونده
سعادت ایشیقی واردی گوزونده،گون به گون سنیچین جلالت اولسون
احسن؛ تقی منش،تقوا پیشه سن،دوزلوگه آتیب سان یقین ریشه سن
جهلین ریشه سینه ویردین تیشه سن،رفتارین کردارین روایت اولسون
ایتمز او مهربان آنا زحمتی،چوخ اولسون اوستونده خدا رحمتی
پیغمبر نوه سی،زهدون آیتی،بو افتخار سنه حلالت اولسون
یاراتدین افتخار بیزیم ائللره،دیمه سین ائلیمیز داشا ،سئللره
لایق دیر کی دوشسون آدین دیللره،بویوک لیاقتین مبارک اولسون
گتیریبلر احسن فصاحتیوه،یییبدیلر غبطه بلاغتیوه
بیزده فخر ایله ریک رشادتیوه،سوزلرین شهدیلن ضیافت اولسون
شهرت آلیب سندن ائلیم فخر ائدر،علمین چایلارینی ییغار بحر ائدر
آبادلار کندیمی گوزل شهر ائدر،سندن اورگندیگیم شجاعت اولسون
مجلس لرده دایم سوزلرین دوشر،سن گلسون مهر اولار کدرلر ایتر
دانیشسان دییه سن شاندان بال سوزر،شیرین نغمه لرین حکایت اولسون
عزت سون انسان آختارار سنی،یوردون جوانلاری هارایلار سنی
(ازبر)سوزلریلن سوراغلار سنی،شعفلی شهرتین مبارک اولسون
ازبر کرمی هشجین
گوزل تانرینین آدیلا آنا یوردوم هِشَجین
پهنه ی عالمه بیر گوهر تابان هشجین دیر عشقلن باخسان اگر روضه ی رضوان هشجین دیر
بو یرین ملّتینین معرفتی،غیرتی،تکدیر سالماسین گوزدن اونی قادر سبحان،هشجین دیر
باخاسان اوزلرینه جلوه لَنیرنور ایلاهی بِجَرَن بیر بِله انسانلاری انسان، هشجین دیر
بورا بیر یردی محبّتله یاشار شیعه وسنّی یاغدیران قلب لره وحدت و ایمان هشجین دیر
عرصه ی علمده عالم لرینین یوخدو نظیری شهرتی داغدان اوجا، علمده عمّان هشجین دیر
باشقادیر رنگی شهیدلر قانینین رنگی شفقدن یاراشان شانینه بس عزّت شایان هشجین دیر
سن وفا،مهر و محبّت دادینی بوردا بیلرسن آخدیریب کونلوموزه مهر فروزان،هشجین دیر
یاز یلی بوقدالارین تِللرینی نازلا داراقلار نِجه کی شانه لَنَرزلف پریشان ،هشجین دیر
دشتینین غلّه سینین رنگی بوتون رنگدن آرتیق قصر رؤیاده گزنده قیزیل ایوان هشجین دیر
پای وریب یوردوموزا تانری بیزیم شانلی طبیعت یای قیشی گورمه لی دیر،یازدا گلستان هشجین دیر
آنا یوردوم دی من آیریلمارام اوندان، اودا مندن گونده مین یول دییَرم جان وطنیم جان هشجین دیر
آق داغ آدلی یازیلان سویمه لی بیر نشریه سیلن شوره گلدیم کی یازام وصفینه دیوان،هشجین دیر
او وطن دیر کی شرفلَندیرر انسانی جهاندا افتخاریم،شرفیم،شوکتی مهشان هشجین دیر
چوخدور ارباب کمالی،یایلیب کلّ جهانه (ازبر)ین شعرینه ایستکلی بیر عنوان هشجین دیر
یای گونی زمیده بوغدا بیچنده
پاییزین بیرگونی سندن کؤچنده
آیریلیق باده سین سنلن ایچنده قامتینده قالدی گؤزوم آغ داغیم
سندن بولود آشیب آغلایان گؤنی
قیین گلین بلین باغلایان گؤنی
محبت قلبیمی اوخلایان گؤنی اؤرییمده قالدی سؤزوم آغ داغیم
هرگؤن اوجالمادا شهرتین شانین
گزیر دامارلاردا آتشین قانین
باغلی بولاغلی دیر دؤورون هریانین هجرانیوا نجه دؤزوم آغ داغیم
باشیندا آغ پاپاق آی قوجا بابا
دؤشونده کهلیکلر سالیبدر یووا
اتگین ائللره دوروبدور هاوا آیاغین یتیریراوزوم آغ داغیم
سن بجرن ایگیت قوچاق دیر قوچاق
سندن دوشر بوتون تولکلر قاچاق
اصلانلار سنه سن اونلارا دایاق آیین شایین گزیر قوزوم آغ داغیم
اسنده چؤللره سرین یئللرین
دارار آداخلی قیز قارا تئللرین
سنلن یاشایاجاق شنلی ائللرین مینلره دؤنه جک یوزوم آغ داغیم
اون دورت گجه لیک آی گؤیه چیخاندا
محبت کدری یره ییخاندا
عشقلن بیر بیرین اللر سیخاندا گؤروشووه گللم ئؤزوم آغ داغیم
سن منیم ائلیم سن سن منیم اؤبام
سن منیم آرخام سان سن منیم یووام
گؤللرین گؤلوشون گؤرمه سم مودام گؤ زومدن قان یاشی سوزوم آغ داغیم
گؤزل لده ن خوروش رستم دیارین
آزالماسین گؤروم سرین سولارین
آختاراندا (ازبر) نقشین نگارین سنه ساری اولسون اوزوم آغ داغیم
هشجینیم یاز کیمی سو آخسین آراز کیمی
آدین سازلا سویله ییم بیر شیرین آواز کیمی
هشجین لی آی پارا شافاق سالیر آیلارا
یایدا یانیق گورمه سین قیشدا دوشمه سین قارا
خوروش رستم ائللری داراق دارار تللری
قنده،بالا بنزه ییر ائلین شیرین دیللری
وطنیم سوزوم سندن چکیلمز گوزوم سندن
داش قوموندان بیر بویماق بوینوما دوزوم سندن
هشجین ده قوجالار باغچالارا سو جالار
قوجایا حرمت اولسا عزّتیمیز اوجالار
هشجین گول بوداغی غنچه دیر گول بوداغی
نه وقت گِدرسینه م دَن آیریلیقین بو داغی
وطن سنه جان دِدیم جان سنه قوربان دِدیم
سنده یاشایانلاری دردیمه درمان دِدیم
وطن چولی گول کیمی بیر ساری سونبول کیمی
اکین چی نی دیندیرَر مهربان کونول کیمی
وطن اوره گیم یارا سوزومی یتیر یارا
چتین دیر آیریلیقین آز قالیر باغریم یارا
وطن داشی سیر داشیم سنّی، شیعه قارداشیم
بیرلیگینه ائللرین لایق دیر وِرَم باشیم
دوستلوقون واردیر دادی بویوک دونیا خیردادی
آمما حِییف دونیاد دوستلوقون گدیر دادی
وطن وطن آی وطن شنلیک سسین یای وطن
آبادلیق عطری گلیر قوناق لارین سای وطن
هشجینین شاه داغی گونده گوروم آغ داغی
یاخشی قویدون کونلومه ائل دن آیریلیق داغی
وطن خزان گورمه سین ائلیم یامان گورمه سین
وصفه چَکه بیلمه رَم نازلی یارین گورمه سین
سَنی آتدیم داغلارا آللی گوللی باغلارا
قارا تِلین هوروگون تاپشیردیم داراقلارا
یاپراقین سارالماسی قاشلارین قارالماسی
بال داندا شیرین گَلَر دوستون یادا سالماسی
آغ داغین سَرین یِلی یوردوم گورمه سین سِلی
بیرلیکلره باغلانیب ائلین آرخاسی،بِلی
بیر یوواسیز قوش اولسام بیگانه یه قوشولسام
وطن یادیمدان چیخماز گوزدن آخار یاش اولسام
هشجین ده آنالار گوزه باشین دولانار
یوردوما قوناغ گَلسه قاپی باجا سولانار
نمهیلین خیاری سو گلَر گجه یاری
یارین باغری یاریلار گلمَسه گجه یاری
هشجینین دوزلَری ائاین گولسون اوزلَری
(ازبر)وطندن یازار قان یاش توکَر گوزلری
هشجینیم بال کیمی چمن لری یال کیمی
(ازبر)سندن دانیشسین بیر دیل آچان لال کیمی
یا حق قیزیل اوزن
عزّتون،حرمتون،سویون چوخ اولسون،شهرتون اوجالسین آی قیزیل اوزن
سندن بهره آلسین اوزلری گولسون،ائل غمدن قوتارسین آی قیزیل اوزن
بورولوب گدیرسن داغلار آراسی،قیشدا گلر سندن خش خش صداسی
گوزوندن یاش توکر سویون صوناسی،مهربان آنایا تای قیزیل اوزن
آنا لای لایی تک گلنده سسون،دیریلدر اولونی ایستی نفسون
انسانا جان ورر شورون هوسون،سنه فخر ایله ریک آی قیزیل اوزن
سن بیزه سو وردون وفالی چاییم،ایشیق سالسین سنه گونشله آییم
چمن لنسین سندن دوزوم دولاییم،شهرتون هر یانا یای قیزیل اوزن
سن بیزه ناز ایله آی گول اوز لی یار،یوردومی یاز ایله اولسون یادگار
جوشقون چشمه لرون اولسون پایدار،ور خوروش رستمه پای قیزیل اوزن
گون چیخسا آدادا اوینار بالیق لار،یای دوشندن چیمر سنده اوشاقلار
سسونن اوخوللار گلینلر ،قیزلار،تللرون اوزونه یای قیزیل اوزن
هر یردن سووشدون قیزیلا دوندی،توپراغلاری یاشیل دونا بوروندی
میوه قورتولمادی دالی سوروندی،آغزون شیرین اولسون آی قیزیل اوزن
یادیما دوشنده گوزوم دولاندا،قورالار یتیشیب اوزوم اولاندا
سازیمدا سنیچون سوزوم اولاندا،ور منیم هاییما های قیزیل اوزن
سازاخلی سسلرون یاردی باغریمی،اَسدی سرین یلون آلدی آغریمی
صفالی چملرون کسدی صبریمی،بیرده قوناغ چاغیر آی قیزیل اوزن
سنه گلن قوناغ یورقون اولماسین،چتینه دوشمه سین یولدا قالماسین
سندن باشقاسینی یادا سالماسین،قوناغلارون بیر بیر سای قیزیل اوزن
ائللرون یوخسوللوخ،آجلیق گورمه سین،بورانا طوفانا قارا دوشمه سین
ائللر بیر بیریندن آیری دوشمه سین،بیرلیگین هارایین یای قیزیل اوزن
بالاجا چایلاری ییغدون بیر ائتدون،بیرلیگین معناسین آشکار ائتدون
بیر لَشَن ائللردن حمایت ائتدون،اولماسین زحمتون ضای قیزیل اوزن
چوخ یول دولانیبسان یادگار قالان،آذربایجان،زنجان،اردبیل،گیلان
بیرلگین سسیلن ایل بویی جالان،نی ده بیرلیک سسی های قیزیل اوزن
داغدان گلن سویی قوناغ ایله دون،داغلاری اوزووه دایاق ایله دون
دولاندیقین یری سن باغ ایله دون،اول بیزه مهربان آی قیزیل اوزن
هر دم ده بیر اونودوبسان بیزلری،اللردن آلیبسان چوخ عزیزلری
قانا دوندریبسن یاشلی گوزلری،بیر آز انصاف ایله آی قیزیل اوزن
سنلن خاطراتی چوخدور (ازبر)ون،یادیندان چیخاتماز سنی دوستلارون
اوخوسون سنیچون گوزل قوشلارون،گوللرون آچاندا آی قیزیل اوزن
شادی را هدیه کن